Vísbendingar eru um að loftræsivenjur íbúa hér á landi hafi breyst þannig að gluggar eru minna opnaðir nú en áður. Einnig er borgarumhverfið stöðugt að verða skjólsælla vegna aukins gróðurs sem dregur úr loftskiptum vegna náttúrulegrar loftræsingar. Á sama tíma hafa kröfur neytanda um loftgæði og þægindahitastig heimila aukist. Þessir þættir verða til þess að stýrð loftskipti verða nauðsynleg.
Loftskiptakerfi með varmaendurvinnslu og síum leiðir til þess að:
nægu fersku lofti er veitt inn
fersku lofti er veitt inn án þess að kæla íverurými
að rakt notað loft er dregið út
dregið er úr orkutapi með varmaendurvinnslu
minni óhreinindi berast inn vegna síunnar
minni umhverfishávaði berst inn ef opnanleg fög eru lokuð
Auk þess er hægt að stilla kerfin þannig að vægur yfirþrýstingur sé í íbúðum.
Í nágrannalöndum okkar, s.s. Danmörku og Noregi, hefur það verið reglugerðarkrafa að setja upp loftskiptakerfi með varmaendurvinnslu í nýtt íbúðarhúsnæði um árabil. Ástæða kröfunnar er að dregið er úr orkutapi með því að endurvinna varma við loftskipti. Það er sem sagt orðið sjálfsagt að íbúðir séu með loftskiptakerfum víðsvegar um Skandinavíu. Ætla má að þróunin verði svipuð hér á landi landi því byggingarmarkaðurinn fylgir almennt hinum Norðurlöndunum.
Félagið Vistbyggð bauð upp á fyrstu Svansvottuðu íbúðarhúsin á sölu á almennum markaði 2019, en mikil aukning hefur verið í að Svansvotta íbúðarhúsnæði síðan þá. Í flestum þessara verkefni, ef ekki öllum, er sett upp loftskiptakerfi með varmaendurvinnslu til að standast kröfur um orkunotkun bygginga.
Uppsetning á sjálfstæðum loftskiptakerfum fyrir hverja íbúð í fjölbýlishúsi getur leyst ýmis hönnunar vandamál. Til dæmis þarf ekki sérstakar brunavarnir ef sjálfstætt kerfi er fyrir hverja íbúð. Auk þess berst hljóð ekki á milli íbúða í gegnum loftræsistokka ef um sjálfstætt kerfi er að ræða. Íbúar geta einnig stýrt sínum aðstæðum innandyra óháð nágrönnum sínum. Hægt er að stýra bæði hitastigi og rakastigi með Flexit kerfi. Algengt er að setja upp rakaskynjara á baðherherbergi. Einnig er hægt að stýra út frá koltvísýringi og hreyfiskynjurum en það er óalgengara.
Einnig má nefna að ef byggja á þar sem er mikill umferðarniður geta loftskiptakerfi verið góð lausn. Kerfin veita inn fersku lofti þó svo að opnanleg fög séu lokuð, þannig má draga úr að hávaði utandyra berist inn.